Domus Consolationem

SEPTIEMBRE 04, 2021 | APUNG CION: INDUNG BABIE CAPASNGAUAN AT CAPANATAGAN CANITING PANDEMIANG DARALANAN

Mirarangal ya ing Nuan a Virgen Maria anting Indu ning Capasngauan, pablasang capamilatan na, tinubud ne ning Dios i JesuCristo anting Talapamatula ning yatu. Manga canitang Calabing Pitung siglo, ing Indu ning Capasngauan o ing Indu ning Cintas megi yang titulong pecaparangalan ning Orden Agustino king Virgen Maria.

Migmula iti caring Agustino a mismung pacalapit kinh bie ring miyindung Santa Monica ampon San Agustin a maralas mipapakit miabe cambe ring larauan ning Indung Maria ampon ing Anac a Jesus caring miyaliuang pamilarauan.

Agpang careting titulo, dacal lang imagen ampon larauan ding pacarikil king Virgen cagum ning musmus a Jesus, a babie king cintas cang Santa Monica ampon cang San Agustin anting tanda ning Capasngauan. 

Banuang Labing Apat a libu't Atlung pulu't Siam, iniang ing Orden genap ne ing catungculang talacad pangcat ding laicos king "Cofradia ning Cintas". Banuang Labing Apat a libu't Siam a pulu't Lima naman, iniang ing pisambang Agustino carin Bologna, mitalacad ua ing "Cofradia nang Santa Maria ning Cintas". Banuang Labing Limang libu't Pitung pulu't Lima, misanmetung la ring mapilang cofradia anting metung a Arquicofradia ning Cintas, a tinanggap dacal a indulgencia ibat king Santa Sede.

Agpang king tradicion, i Santa Monica, misaldac king pamagmalun pauli ning pangayangu na bie ning keang asaua ampon ning pangalili ning keang anac, petilipanan ne ning Virgen Maria cambe ning Musmus a Jesus, a migindapat mampang tula kea o capasngauan. Inabut ne ning Indu ing metung a cuerong cintas saca na iniauad cang Santa Monica ing isulud ya iti anting misusundu nang tanda ninh keang pangauatiu, ampon metung a mayayakit a tanda ning pamipasican lub. 

Ibat canita sinulud na neng Santa Monica ing cintas, at caibat nang meconverte ning keang anac, peyabut nia naman iti king kea anting tanda ning mamantabe nang pamaningat ning Virgen Maria. Inia, king caparang tradicion, megi yang purmeru ampon caraniuang tanda caring savlang tutuntun king Tuntunang Agustino.

Ding aliuang titulo ning Virgen Maria a parangalan ning Orden ila ring: Indu ning Casaupan, Gracia, Mayap a Usuc, ampon Capasngauan — pisisimburianan da ing metung a pamagmasabal king Indu ning Dios anting talasaup o patulunan ning keang balen, anting makibat caring micacaracal nang cailangan ning ketauan.

Tutung metung yang indu ampon capatad kecatamu ing Virgen Maria, uling anting tapat nang talatuki ning keang Anac, meyapan nong ataruc ding aral ning lugud a e paisip sarili ampon malaus lub a pamaniuyu. Anting Indu ning Capasngauan macapasubali yang malapit caring mangailangan pamanantabe ampon pamamatula. 

PANALANGIN KING INDU NING CAPASNGAUAN

Daralung ke cabitisan mu, O Casantu-satusang Virgen Maria, Indu ning Capasngauan, aduan mi ya keca ing pangaingat na't pangacambil ning kekeng Obispo, i N. Aduan ming cambilan me ing Banal a Casalpantayanang Catolico capamilatan ding kecang panalangin, irayu me ibat caring pamanaria, at mitalacad cang capayapan busal ding pun ding Cristianos ampon caring talasalpantaya, at migit caring sabla ing pamagbalic ra lub ding pacacalulung palpicasala, ampon casngauan caring mamagcasakit a caladua king Purgatorio. Yanasa.

Ipanalangin mu cami, O Indu ning Capasngauan.

Ban keng mangaintulid caring pengacu na ning Guinu ming JesuCristo.

O Guinu ming Dios, capamilatan ning Virgen Maria malam meng tinubud i JesuCristo ban mamatula king kecang balen; ipagcalam mu sana, capamilatan ning keang pamamilatan,  ing micapnuan cami caring sablang capasngauan layun irake ya iti caring kekeng capatad. Iti yang aduan mi king capamialatan ning Guinu ming JesuCristong Anac mu, a mabibie ampon mag-ari cambe mu, king cametungan ning Banal a Espiritu, Dios, mangga man king alang angga. Yanasa.

Banal a Maria, Indu ning Capasngauan ampon Cintas

— Ipanalangin mu cami!